「師傅！剪個比比鳥頭！霸氣少少嘅，唔該！」毛毛遞上參考相片：「不過你識唔識剪先？」

「我知呢個髮型！有後生仔拎住張相叫我剪㗎，一啲難度都冇！」

原來比比鳥嘅威力大到已經攻佔埋傳統理髮店，真係失敬失敬！

「而家除咗熟客，都多咗後生仔幫襯，佢哋成日要求剪唔同嘅髮型，甚至叫梁仔自由發揮，好信得過我哋㗎！」

剪髮兩個字 一生一世

梁仔，全名梁成。新東亞理髮店老闆。

喺19世紀開始，理髮店發展蓬勃，但去到而家已經有好多舊店結業，只係得返三十幾間老店屹立不倒，仍然為附近嘅街坊服務，而新東亞理髮店就係其中一間（暫時）。

講起舊式理髮店，好少後生仔夠膽入去試，毛毛依家身先士卒，帶大家深入睇下。

舖頭麻雀雖小但五臟俱全，盛載住嘅係兩夫妻三十六年嚟，風雨不改地為油麻地街坊服務嘅故事。

髮型的重要性

究竟點樣樣先可以剪個靚嘅髮型？又或者咩嘢先為之係一個好嘅髮型？

難得見到縱橫五十四年剪髮界嘅兩位，毛毛梗係唔會放過呢個機會啦，即刻幫大家問下，點先可以「恤」個靚髮，齊齊脫毒！

「其實個髮型好唔好睇，都要睇返面型、髮質、髮線⋯」

咁即係「你的樣子如何，你的髮型也必如何」啦！雖則如此，個樣改變唔到係事實，但梁太話有啲伏係可以避免嘅。

其實剪頭髮都係在乎溝通與關懷，唔好以為畀張相師傅睇，會畀人笑。「唔使驚㗎！講清講楚就最好。」正確方法應仔細諮詢師傅意見，多啲留意師傳每一下落手，避免意外頻生。咁樣個髮型先可以襯返你個面形，個面形又襯返個身形，個身形又撞返啱個面形⋯⋯但毛毛始終都係毒L，只係夠膽話：「照舊得㗎喇⋯⋯」

物輕情義重

就算舖頭三年前因為業主收樓問題搬遷，梁仔同梁太都堅持要將老舖嘅一磚一瓦、每件架生搬到新舖，令?啲「分分鐘大過你」嘅工具可以繼續幫街坊們理髮。

普通一張收銀台，陪伴兩位幾十年。搬遷時曾因過大入唔到門口，兩位都捨易取難，將收銀台斬開再重組而唔隨便拋棄，全因一句「用開有感情嘛！」

真皮理髮櫈已經有五十幾年歷史，曾經有無數嘅座上客。

大大個風筒，重係重咗啲，但勝在夠晒熱力同風力，可以做到唔同髮型。

牙籤！？你冇睇錯！天生我材必有用，牙籤都可以電髮！梁太話咁幼嘅牙籤加埋電髮紙，就最啱幫短髮男士電髮。

呢個唔係洗手盤咁簡單，實質係客人洗頭嘅地方。好多人都覺得洗頭時，同髮型師咁近距離傾偈好老尷，咁洗法咪唔驚囉！

視覺大挑戰

髮型日新月異，梁仔同梁太以前剪開「花旗頭」同「游水頭」，唔知面對住以下呢幾種新潮嘅髮型又會有乜睇法呢？

視覺系代表

面對住七彩顏色、三尖八角嘅視覺系punk頭，梁太面有難色同錯愕，「呢啲髮型應該登台先有㗎咋！你真係想試？」

2. 大執陰代表

前陰長到眼係潮流，「的水」長到下巴係時尚，再加埋頭頂剪到碎一碎，呢個興極一時嘅髮型，梁太一句就完美KO：「好似十年前有興過下嘅」。

毛毛再問落去，梁太就用電話畀咗十幾張客人嘅相毛毛睇，有各式花紋嘅Skinhead，仲有唔同顏色添，可以話同新式髮型屋冇分別。「甚至有啲老一輩要求剪新潮髮型，我哋都照樣剪到」，睇過？又真係毫無違和感。

梁太強調，無論咩髮型，佢哋用舊架生都做到一樣效果。

點解做幾十年都要做落去？

髮型屋嘅收入，同之前比大相逕庭，但兩位都堅持每日幫街坊打理頭髮，將生意拋諸腦後。

「咁街坊需要剪頭髮嘛，如果我唔繼續經營傳統理髮店，就冇人再做，所以做得就做啦！」

梁仔之前曾經係其他報導表示，同街坊多年嘅情誼遠比金錢重要，一生花咗五十四年係理髮行業，點都會堅持落去嘅！

眾所周知，潮流係一個循環，或者有一日你會拎返櫃桶底嘅Super-X，咁傳統理髮店重新走向潮流嘅尖端亦指日可待！

（多謝新東亞理髮公司畀毛毛嚟蛇王）

===============================
毛記專題，不定期上市。
求其交貨，純粹扮工蛇王，唔使期待。
#100毛 #毛記電視