講起萬聖節，九成人都淨係會諗起老蘭啲俏護士同兔女郎，Come on！咪咁先得㗎，pure返少少啦好冇！萬聖節其實係個大人細路都啱玩嘅日子，唔信？睇下幼稚園嘅Party先啦！

相信大家嘅facebook呢兩日都畀呢個超打耳嘅無臉男洗晒板。通常個個細路女都鍾意扮Elsa公主㗎嘛，但呢個小妹妹竟然扮無臉男！單係呢顆看透世事嘅心已經贏咗唔少網民嘅掌聲！

無臉小妹妹都相當入戲，木口木面咁一直等緊一個機會…… 佢咩都冇做只係靜靜咁坐喺度已經成功嚇到隔籬個同學仔喊晒口，今年萬聖節大獎好難唔頒畀你喎！

你以為幼稚園萬聖節Party就只係成班細路講句「trick or treat」、食粒糖咁簡單咩？呢度，根本就係一個屬於家長嘅戰場！扮無臉男係就係好打耳，不過講手工，呢個細路嘅幕後設計師－即係佢媽咪，贏到超晒班呀！

乜Daddy都咁得閒參加萬聖節Party，同囝囝二合一扮鬼咁好嘅？唔係喎，睇真啲，隻鬼得一對腳㗎咋！原來樽入面個頭就係小朋友本尊，佢後面個奪命狂呼係媽咪整嘅超強道具嚟！開個Party都咁認真，你叫只係畀頂巫女帽個小朋友戴嘅媽咪情何以堪呀…… 

班小朋友玩得開心，做老師嘅又點可以執輸！呢兩個阿Sir 搣時就扮飯糰同中產咖啡女神喇！呢兩位真係敬業樂業嘅好老師，而家市道唔好，搵食艱難呀，毛毛明嘅。

Miss Coffee仲趴埋落地下搵替死鬼同班小朋友打成一片，真係好有愛心、好專業呀！而佢身邊嘅兩位同學就表示：早知我的志願唔寫自己想做老師啦…… 

封面圖片、資料來源連結：艾摩妞的萌寶&咩寶、施屁瑜、陳文倪