萬聖節咁開心嘅日子，點可以淨係人類有得玩㗎？梗係要同埋屋企嘅寵物一齊慶祝啦，最緊要好玩呀嘛！

多數主人都會花心思幫狗狗cosplay，搶fo之餘又可以順便恥笑下佢哋個傻瓜樣～不過見到隻狗狗眼神死個樣就知道，其實佢自己唔多enjoy啦……呢隻八哥一定心諗：「又話一齊玩，而家似我畀你玩多啲喎主人……」

慶祝萬聖節嘅時候，你有冇諗過狗狗嘅感受？你冇！因為你只想到自己！但呢個主人就唔同喇，佢竟然扮狗狗最鍾意嗰隻綠色公仔呀！金毛狗狗Jolene有個好朋友，就係呢隻綠色公仔喇，佢時時刻刻都要攬實佢，同佢傾心事㗎～

有日Jolene同公仔玩緊嘅時候，一抬起頭，竟然見到超級巨大版嘅綠色公仔向佢行緊過嚟呀！公仔！點解你無啦啦高咗又肥咗嘅汪汪！

見到公仔變到大隻過自己，仲要識行識走可以真係陪自己玩，狗狗梗係high到係咁揈尾，仲跳埋上佢個身度啦！狗狗應該諗都諗過，原來佢心愛嘅加大碼公仔竟然係主人扮㗎！

呢個主人肯扮公仔氹狗狗開心已經唔話得，佢仲要用呢個look帶狗狗go街街呀！Jolene肯定開心到唔捨得返屋企，要話晒畀附近其他狗狗知今日係佢狗生以嚟最幸福嘅一日呀！如果畀Jolene知原來加大碼公仔係主人扮，唔知佢會唔會想主人以後都唔好變返正常呢？

封面圖片、資料來源連結： tora_pom_happylife／instagram、Jolene The Golden、Emily Crisp