唔知點解日本嘅飯糰係特別好食嘅，但係整得多都會厭㗎嘛！雖然味道係有啲唔同，但係嚿嚿唔係三角形就圓形，要整特別形狀又要用公仔模咁麻煩，唔通就唔可以有啲簡單得嚟又有啲新意嘅方法用嚟整飯糰？

成日叫人不要玩食物，夠喇！玩食物唔一定係嘥嘢嘅～識玩，一定係又有得玩，玩完仲有得食啦！好似日本呢一款紙咁，呢張笨唔係一張普通嘅摺紙，佢嘅真正身份係一張飯糰摺紙，只要用咗佢，你就可以創造出各式各樣形狀嘅飯糰喇！

用法好簡單，首先跟說明書摺返啲㾗，然後鋪返張保鮮紙，跟住鋪返啲紫菜呀～飯呀～餡呀咁～再跟住說明書好似你平日摺埋自己咁摺埋佢就得㗎喇！

由於時間嘅關係，我哋直接睇下啲完成品啦～有Bowtie款，又有富士山，仲有波點同埋「扭計蛇」咁嘅款嘅飯糰呀～係咪望落每一款都既特別又有心思呢？所以話，只要用心，一嚿飯都可以有好多變化㗎！

原來一開始，發明嘅人係喺東日本大地震之後嘅馬拉松義工活動度派呢啲飯糰摺紙畀參加者，等佢哋又可以玩摺紙又有得食。呢個設計仲拎埋獎?！梗係啦，話晒將日本傳統文化嘅摺紙同日本家庭必整嘅飯糰完美融合喎，真係抵畀個like佢呀！

不過呢個商品其實仲喺集資嘅階段，所以市面上係冇得賣住㗎。不過咁有創意，相信都會有好多人支持嘅～希望好快就喺日本正式發售啦，到時去日本買嚟做手信同班Fd子一齊邊玩邊食，簡直係冇得彈呀！

封面圖片及資料來源：makuake.com、新田知生／Youtube