細細個，毛毛都好期待聖誕節，除咗以前唔使擔心冇女呢個問題之外，仲有係因為有聖誕聯歡會呀！有得玩、有嘢食、又有獎抽，簡直係所有學生最期待嘅一日！

驚險抽獎

以前抽獎筆直得二十蚊，大家一係買杯、一係買文具，無乜驚喜，但起碼無伏。

去到中學，大家良心開始埋沒咗嘅時候，聖誕抽獎就變到好似俄羅斯輪盤咁恐怖，米啦、通勝啦、廁所泵啦、已經出晒嚟⋯⋯唔好話要抽到大獎，想抽到一份正常少少嘅禮物都好難呀！

無聊遊戲

無論係小學定中學，踩波都係必玩嘅遊戲。雖然毛毛唔知遊戲箇中嘅意義，但聽到啪啪啪聲，同女同學嘅尖叫聲，真係諗起都興奮！

除咗踩波，講求速度同反應嘅爭櫈仔都係必玩嘅！好多本來話無鬼聊嘅同學仔，一聽到音樂就會不能自拔，玩得好投入。

雖然遊戲贏咗無獎，但難得成大班同學一齊玩，係開心嘅！

最正都係大食會

小學嘅大食會，通常都係一眾老母比試廚藝嘅大日子，又有肉醬意粉，又有炒飯⋯毛毛老母都唔輸蝕，每一年都為大家提供菠蘿腸仔！

就算中學聖誕聯歡只係叫到會，大家排排坐，圍埋一齊食嘢，都已經好開心喇！

雖然大個咗公司都有聖誕Party，但已經搵唔返學校聖誕聯歡會嘅感覺喇～