你有壓力，我有壓力！呢句嘢聽就聽得多啦，雖然十年過去，巴士阿叔一早已經睇化晒，但作為香港人嘅我哋，就仍然覺得呢句說話講得好中……其實我哋好簡單㗎咋，收工嘅時候仲見到日頭、搭地鐵唔會畀喼神轆到對腳、搭巴士大大家都肯企入少少，就已經心滿意足㗎喇。

開心，本來真係可以好簡單嘅。有個中學生見大家生活壓力咁大，就特登整咗個放滿糖果嘅紙箱，放喺大埔街頭，等咁多位街坊經過嘅時候可以伸隻手入去抽下小禮物。以前成日聽人講「香港地隨街都有金執」呀，但估唔到執唔到金，隨街有糖拎都可以咁開心咁sweet㗎～

原來紙箱入面嘅，唔止得糖㗎，個有心嘅後生仔仲寫埋心意字句送畀大家，希望為收到嘅人帶嚟溫暖～就好似呢句「休息，當你疲倦時」咁呀，真係令人不禁想放慢腳步，慢慢欣賞下身邊嘅景色，呼吸下新鮮空氣呀～

只係小小心思，但就已經為大埔嘅朋友帶嚟大大意義～後生仔，好多謝你對香港人、對自己地區嘅心意呀！

封面圖片、資料來源連結：Tai Po 大埔