細細個冇錢買模型，睇電視見到打怪獸啲飛機咁有型真係好葡萄，好想擁有一隻㗎！好彩以毛毛嘅聰明點會難得到我呀，用原子筆同間尺自己整咪得囉～仲可以撩埋隔籬位同學一齊鬥機?！呢種情懷真係諗起都即刻想「起機」呀！

冇啦啦講起啲陳年舊屎，咪就係因為見到有日本網民用晾衫夾砌咗隻戰鬥機出嚟囉！唔止係外型，連顏色都特別襯過㗎，側邊嗰兩隻衫夾仲可以解體做飛彈?！

冇咁多隻晾衫夾？唔緊要，有衣架都一樣得啫！你睇下呢個網友左扭扭右扭扭，咁就畀佢扭咗㗎「畸形戰機」出嚟啦！不過佢話其實佢係想整拳刃㗎喎⋯⋯你呃人，明明就係FF－22 畸形戰機嚟㗎喎！

Any肥，以上機師都經過長期專業訓練，奉勸屋企嘅廢青唔好亂試，唔係阿媽肯肯定請你食藤條炆豬肉呀！同埋介紹返，其實想整飛機笨唔使拗到個衣架咁嘅，日本已經有現成嘅飛機衣架賣喇～不過買完記得收好，唔係實好快畀人拎晒去「放飛機」或者捉飛行棋呀！

封面圖片及資料來源：hayate334／twitter、日本樂天市場