那些年，細路仔唔識世界，見到啲人擺檔話名廠減價大清貨，都真係會信佢係問廠攞貨先咁平㗎，大個咪知道其實係LV同LW嘅分別囉～不過一班媽媽級嘅Auntie總會好傻豬豬咁買咗返嚟，仲好開心咁話執到平嘢喎，都唔知講唔講個真相佢哋聽好呀……

不過你講畀佢聽，都好過要佢自己發現畀人搵笨嘅，好似台灣呢位Auntie，去街市買餸見到奧地利水晶鏈一折喎，嘩，原價要859蚊台幣，而家600唔收你，400都唔收你，85蚊台幣就有交易，計返都係廿幾蚊港紙咋喎，買畀細路女做玩具都抵啦！

咁人哋一番心意送畀阿女，做阿媽係開心嘅，點知一拆開⋯⋯說好的頸鏈呢？喺呢個包裝精美嘅盒入面，係一條銀色橡筋，同埋一粒懷疑係老闆所謂嘅「奧地利（膠）水晶」。條橡筋仲要細條到呢⋯⋯老闆，你確定有任何人類條頸可以戴得落？

呢位媽媽又唔使咁灰機嘅，應該係Auntie講錯，人哋係買個盒送手繩啫～其實老闆不知幾用心良苦呀，細路女大得快呀嘛，所以咪搵條超有彈性嘅高級鍍銀橡筋囉！仲可以當埋紥頭髮橡筋用，簡直頸鏈嘅價錢，橡筋咁多用途呀！Between，其實廿蚊買條銀色橡筋都冇咩啫，人哋用千幾萬買咗幅冇咩人會買嘅字畫都係咁啦～

封面圖片及資料來源：吳慧君／爆廢公社