那些年，相信大家都曾經訂過學校飯盒，等到長都頸埋都係等食漢堡包餐嗰幾日咋！為咗嗰幾日，平日嗰啲鼻涕汁栗米六粒飯就算幾難哽都冇所謂啦。但係每次放學睇卡通片，睇到人哋日本小學生又咖喱又布甸咁，真係想大聲問一句，公平咩？咁都未算呀，睇埋呢個午餐，肯定你仲葡萄過葡萄乘淑儀呀！

嘩！Lun廚啫，使唔使玩咁大呀！係原隻松葉蟹呀，仲要係人人有份，永不落空，真係成個課室都係蟹，全部都係蟹呀！呢個咁豐富嘅LUN廚係日本鳥取縣岩美町町政府，請町入面唯一一間國中嘅國三準畢業生食嘅畢業大餐嚟㗎！

話明係全町the one and only one嘅國中，又話晒係佢哋本土出產嘅未來「主印勇」，食返本土出產量第一嘅食材嚟做一個總結，聽落係完滿嘅。你睇下妹豬拎住個條嘢fing下fing下幾開心，講緊嗰條喺蟹腳抆出嚟嘅原條蟹肉呀！

其實呢個請大家食蟹嘅活動，今年已經係第四年搞㗎啦，為咗畀佢哋食到最新鮮嘅食材，啲蟹仲要係一朝早捉到就送去學校蒸㗎！見到啲畢業生食得咁滋味，相信佢哋食飽都安心上路，出去迎接呢個咁殘酷嘅社會㗎喇。睇緊呢篇文嘅你哋都唔好太傷心喇，雪櫃仲有兩三底糕等緊你哋㗎！

封面圖片及資料來源：朝日新聞