開講有話，老虎唔發火，咪當係病貓，雖然老虎同貓都係貓科動物，不過老虎就威猛得多喇。除咗阿拉丁條女會覺得佢安全過飛氊，一般人都係寧願做貓奴好過，起碼主子餓起上嚟唔會當奴才係午餐吖嘛～但係點都估唔到過完年，就連老虎都搞到霸氣盡失呀！

叫咗你過年唔好食咁多嘢㗎啦！出事㗎嘛！好地地一隻嘅老虎，肥到成個波咁，成何體統呢？呢鋪真係霸氣盡失喇，Molamola，以後仲點帶你出去威呀！咪住先，佢攤喺度瞓覺個樣咁熟口面嘅？

係喇！咪就係同屋企隻主子Exac7ly一樣囉！簡直係完美同步，完全表現出貓科動物嗰種食完就瞓嘅神髓呀～果然老虎嘅身體始終係流住喵星人嘅血，唔怪得畀人叫佢做大貓喇喵～

有網友仲畫咗幾幅老虎跟主子學做貓嘅漫畫，係咪即時覺得呢隻大貓萌咗好多呢？

雖然老虎大人係畀呢輯發福相搞到形象盡毀，但係你又唔使咁sad嘅，其實好多老虎都好似你咁，因為冬天凍要儲多啲脂肪禦寒，所以咪食到成個波咁囉，過咗冬天就會回復返窈窕嘅身形，到時又可以虎虎生威喇！

老虎冬天食肥咗，夏天就識瘦返，咁點解人類過完冬天都唔識瘦返㗎，公平咩？嗚⋯⋯過完年又肥咗幾磅?⋯⋯老虎大哥，可唔可以分享下你嘅瘦身貼士呀？毛毛都好想好似你咁做隻食肉瘦呀！

封面圖片及資料來源：微眾圈、tct__nrt_／twitter、ceoboss_mik／twitter