最近，日本發生咗一宗家庭慘劇。

話說事主搬屋嘅時候就唔小心漏低咗十幾張《Magic: The Gathering》嘅遊戲卡喺屋企，點知事主嘅屋企人見到就以為啲卡係事主唔要，咁咪諗住幫佢清理囉！而阿事主嘅屋企人又見到堆卡好似keep得幾好，於是就諗住放上網賣咗佢唔好嘥嘞。

不過喂咪住先，遊戲卡嘅嘢有平有貴，而且貴嘅遊戲卡貴起上嚟真係可以炒到好乸貴㗎啵⋯⋯你就咁將個起標價set做1000円咁平，會唔會好易蝕本㗎？

有網民發現呢堆遊戲卡果然笨唔係咁簡單，原來張張卡都係貴嘢嚟㗎！尤其係第二排最右邊嗰張「Black Lotus」，聽講一張「Black Lotus」就已經可以賣成50萬円（即係大約港幣35000蚊）㗎喇！喂留意返，50萬円呢個價錢都係講緊「Black Lotus」咋喎，仲都未計其他卡呢⋯⋯嘩嘩嘩！咁今次咪蝕大本？

雖然最後個價已經畀賣家推到成60萬円，但其實事主想唔想賣咗啲卡先係重點呀！既然啲卡咁值錢，而事主又一路都冇賣到出去，咁就足以證明啲卡對佢嚟講係好重要㗎啦，你話你用賣咗啲卡出去之後搵咩嚟賠返畀佢好嘞？仲望咩吖，嗱嗱聲stop咗個拍賣佢啦！

紙包得到雞，但紙係包唔住火。由於呢單嘢喺日本遊戲界已經通晒天嘅關係，事主已經知道咗屋企人嘅所作所為喇，仲即時打電話返屋企叫屋企人搞返掂壇嘢佢?！最後，呢位阿事主嘅屋企人就梗係stop咗個拍賣，兼且喺商品說明嗰欄同一眾賣家解釋返啦。

呢個故事教訓大家，愛惜game卡，遠離家人。

資料來源：ヤフオク!