畫畫呢樣嘢真係好考耐性㗎，特別係畫背景啲Detail位嗰陣，只要畫得稍為Hea啲，少則就畀人cap出嚟恥笑，大則可以令成幅畫都崩壞晒㗎！但係有時候真係唔想喺一啲位度花太多嘅時間㗎嘛，好似畫河入面石頭咁，上面多咗層水反光，啲石頭都睇唔清楚㗎啦，唔係咁都要逐粒畫呀？

呢幅少女踩喺河度嘅畫係咪好有feel呢？有日本網友就教大家一個既方便又快捷嘅方法，只要用一種道具，就可以輕易畫出嗰種隱隱約約見到有石頭喺波光下嘅效果㗎喇。

冇錯！就係用納豆～唔係下化，呢幅畫嘅底下居然係臭崩崩黐笠笠嘅納豆！即刻咩幻想都冇晒囉⋯⋯不過，網友係點化納豆為神奇呢？

首先將張納豆相tune下色、較下角度⋯⋯嗱，咁樣望落咪已經冇咁似納豆囉。然後加少少深啡色，再上返層藍綠色，今次個透明度要較返低少少⋯⋯

再加埋啲波光紋喺上面，然後調整下，咁就做到水底下有一粒粒石春嘅效果㗎喇～係咪好簡單呢？不過首先，你要識用PS或者其他畫圖工具先囉。唔知小畫家得唔得呢下？

封面圖片及資料來源：yuya770／twitter