你哋唔好諗住毛毛係毒L就唔會點買衫呀，其實我都站喺潮流嘅尖der㗎！好似毒L必備嘅格仔衫呀、U記嘅淨色T呀，我都不知有幾多件！不過每次一到轉季要執晒衣櫃啲衫出嚟嘅時候，先會後悔點解當初自己會買咁多衫返屋企……而有大埔街坊就趁住換季，自發搞咗個叫「同路過冬」嘅捐舊衫活動呀！

你睇下真係好多街坊支持㗎！你一袋我又一袋，睇到毛毛眼都濕埋喇！呢啲咪獅子山下體現香港精神囉！聽講過幾日又會再凍啲，將呢啲舊衫捐畀有需要嘅人就啱晒喇！唔單止咁，班街坊仲出動埋街坊泥鯭車，義務將啲衫運去慈善機構，真係出錢又出力呀！

個街坊泥鯭車群組係喺幾個月前成立嘅（回帶：【街坊有愛】自組順風車群組），本身係諗住有車嘅街坊順便車埋其他街坊齊齊返大埔，估唔到而家仲義務幫人車啲舊衫去捐?！嗚嗚，你哋真係好有型好有愛，搞到毛毛都好想搬入嚟大埔呀！btw，毛毛同Dickson都有幾件格仔衫想捐出嚟呀，受唔受我哋玩先？都幾新淨㗎係有少少白色漬啫……

封面圖片來源：Tai Po 大埔

資料來源：Albert Lui、Perry Lin