強國藝術造詣深厚就係人都知㗎啦，唔係點雕得出抽象到畢加索都跪低嘅明星蠟像呢？但勢估唔到，強國都會有對手呀！是咁的，動物園通常都會放園入面有嗰啲動物嘅擺設吸引下遊客影相嘅，但越南呢位網友喺動物園似乎見到啲唔應該見嘅嘢喎。

平時以為熊貓個熊貓眼係因為唔夠訓先有啦，但呢度嘅熊貓就唔同喇，佢哋有嘅唔止係黑色素，更加係與生俱來嘅暗黑氣場。你睇下佢空洞嘅眼神，唔知仲以為係伊藤潤二漫畫走出嚟㗎……而隻功夫熊貓分明就係Walking Dead特別版啦！

豹哥應該冇事喇啩，但係呢隻笨唔係普通嘅豹，係花豹！話明花豹啲豹紋梗係要好似花咁啦，好似係⋯⋯所以隻豹好似生花⋯⋯算啦，你扯喇，毛毛唔想搞大件事呀。

呢隻你估唔做估到係咩？河馬？錯啦，呢隻係馬來獏呀！似河馬多啲？唔通人哋阿媽同河馬有路又要話你知咩。

作為一個動物園，有獅子老虎大笨象，係好合理嘅。但係連呢啲神話動物都有埋⋯⋯條龍當佢係科莫多龍減咗肥啦，之但係呢隻係咩？好似叫咩鷲⋯⋯唔係高X鷲，係獅鷲呀。

唔L係呀牛頭馬面都有？唔係行錯兩步就去咗陰間呀嘛，女都未媾到就要死，公平咩？好彩，原來呢堆係十二生肖雕像⋯⋯

咁十二生肖點解會有貓呢⋯⋯？肯肯定係貓男爵見大家玩得咁開心嚟趁熱鬧喇！Any肥，好明顯呢位越南莫魔（又名麻瓜）唔係去動物園，係去錯咗怪獸與牠們的產地喇～唔知喺度做管理員使唔使讀奇獸飼育學㗎呢？

封面圖片及資料來源：Nguyễn Xuân Quyền／Facebook