西班牙，距離香港10592公里，九年朋友嘅阿欣同Tim用咗一段巴士路程決定，再用一個月籌備，就出發從香港踩單車去西班牙。

 

 

一到落馬洲，阿欣同Tim就即刻起步踩。

 

踩足三個月終於離開中國，再經中亞到達歐洲。雖然九個月後兩位喺伊朗分道揚鑣，但各自都有美滿嘅旅程，喺十五個月後齊齊整整返到香港。

 

喺伊朗分手後，Tim沿住之前計劃嘅路線，穿過北土耳其向西班牙出發（藍線）；而阿欣就喺土耳其慢慢踩到匈牙利布達佩斯（紅線）。

 

不想放大只想放大被放大

騎喺單車上，可以控制自己嘅步伐，鐘意停就停。踩到千里無人嘅地方，包圍住你嘅只有延綿不絕嘅山脈同河流，聽到嘅只有淙淙嘅水聲，同自己一下一下嘅心跳聲。

 

 

「世界就好似得返自己，所以事同物都無限放大」

 

感官擴大咗，相反，戒備心就縮細咗。

 

出發之前，阿欣同媽媽講要去踩單車到西班牙，點知伯母完全冇反對，仲好支持?，只係輕輕交低一句：「小心大陸好危險呀！」
 

初初阿欣同Tim對於Warm Showers（單車友嘅CouchSurfing） 都有少少怯，但慢慢呢個憂慮已經消失得無影無蹤。

 

 

「成個旅程真係遇到太多好人，唔同種族、國家嘅人，本性都係好！」

 

喺貴陽單車連人淋到濕L晒，成腳同單車轆都充滿住黑色嘅泥，就咁去到Warm Showers主人屋企⋯

 

「連自己都覺得唔好意思，但個主人竟然幫我哋推架單車去客廳，成間屋都有條泥跡⋯」

 

平時喺香港，對陌生人點都有份戒心；但去到外地，言語不通嘅情況下，唔知點解隔膜反而會少咗。

 

 

「個感覺就好似多咗好多個阿媽，個個都叫我send相畀佢哋報平安！」

 

真係kind of sweet嘅，怪唔之得阿欣話，每一次離開都係要喊住走。

 

 

爛鬼單車出動

單車旅行，最緊要梗係架單車，一部靚單車當然唔少得。

 

不過，阿欣同Tim就異口同聲話，只要有心，屋企嗰部殘舊單車都可以載你到好遠好遠。

 

「感覺仲正，就好似帶埋個朋友去旅行。」

 

單車唔使變摩托，都可以去世界唔同地方。

 

 

 

除咗單車，同伴亦都係重要嘅伙伴。

 

阿欣同Tim分工好仔細，就係Tim負責晒所有：Plan行程、搵路、帶路（下刪三千項工作）；而阿欣就負責：影相、更新FB（好似無喇）。

 

古乳有暈，同朋友去旅行就最容易嗌交。

 

兩個人，每日都要面對夠唔夠嘢食、夠唔夠衫著同搵唔搵到地方紮營，實有拗撬嘅！

 

「鬧交唔係我哋嘅作風，最多咪黑面囉！」

「哈哈哈哈，係喎！真係冇試過鬧交！」

 

相處得多，有時踩得攰，咪你就吓我、我就吓你。

雖然路行遠咗，但兩個人嘅距離就拉近咗。

 

單車友嘅宿命

 

「天氣！天氣！天氣！」

 

中亞地區喺冬天時份，最低氣溫可以去到零下四十度。

 

 

沿路都不斷畀人鬧「你哋傻㗎」、「我哋冬天去避寒，你哋就入嚟」，但畀人大到慣嘅阿欣同Tim都勇者無懼。

 

「認真，雪櫃係用嚟取暖㗎」

 

如果遇到融雪，情況更加不堪設想，只有推車先可以前進到，或者連人帶車一齊跣落山。

 

「一個唔小心，就係跣出懸崖，咁就GG喇，哈哈！」

 

對平時喺香港都會生凍瘡嘅阿欣，冬天喺中亞踩單車，係一個好大嘅挑戰。

 

由原本對住宿家庭都多多要求，想要有床、有Wi-Fi、有冷氣，去到後來有暖氣就夠。

 

頓時發現，有好多嘢都唔係必需。

 

 

 

旅程過後

 

「原來人生有好多選擇。」

 

今次單車之旅令兩位Fresh Grad睇多咗好多嘢，令佢哋知道，路唔止得一條。

 

原本諗住當係畢業旅行，畀自己一個機會，喺返正職前做一樣唔做會後悔嘅事。

 

點知令佢哋更加不能自拔，誓言一定會有下一次大長征！

 

或者我哋唔需要咁多生涯規劃，好多時船到橋頭，真係會自然直呢！