相信每個返早嘅打工仔都明白朝早一擘大眼就發現自己睡多咗十五分鐘，搞到要嗱嗱聲趕住出門口，連頭都冇時間梳嗰種痛苦滋味，仲講咩落茶記食個沙嗲嘔麵做早餐吖。想有個Good Morning，早少少起身食個靚早餐咪得囉，真係會全日心情好啲㗎～

不過多士嘅嘢，嚟嚟去去唔係搽醬就係芝士火腿，就算隔日食都會悶啦，咁咪又食到變返灰9 Morning？唔使怕喎，最近就有日本網民同大家開心些牙一個簡簡單單嘅整多士方法喇！首先將芝士同火腿切到粗條先～

你唔係以為要再將佢哋切到一粒粒正方形密鋪平面下話？傻豬嚟嘅，話明食完要返工，邊有咁多時間呀。淨係切芝士粒就夠㗎喇，鋪完火腿，再將芝士粒間住間住咁放喺最面咪得囉～

起身刷完牙洗完面就整多士，放埋入焗爐，換好衫出嚟就時候啱啱好，焗到佢溶溶地，食得！呢次仲唔有芝士拉絲多士食？真係超邪惡呀！

雖然食完靚早餐心情係好好多，不過點解一返到公司見到腦細，就即刻冇晒精神嘅……都係整多件做下午茶頂一頂好啲喇。

ベーコンとチーズを編み編みしたトースト pic.twitter.com/jRyndOSkg5

— まいく／固定ツイでリッツパーティ告知中 (@AkibaDailyNewsM) January 6, 2017

罪 pic.twitter.com/IVx2GEgEQQ

— すばす (@sbr116) January 22, 2017

封面圖片、資料來源連結： AkibaDailyNewsM／twitter、sbr116／twitter