有時候，濕滑嘅地板真係比淤塞嘅渠道更令人煩惱呀！而小心地滑牌可以話係邪惡般嘅存在，因為佢永遠都係喺你三百六十度湯馬斯大迴環再一個翻身＿街嘅時候先會畀你見到⋯⋯大佬，可唔可以放喺當眼啲嘅位呀？

嘩，邊個咁冇公德心掉咁大塊蕉皮喺度呀……想跣我？冇咁易！其實呢塊蕉皮係小心地滑牌嚟㗎啫，你哋班友仔成日話睇唔到，而家咁大塊蕉皮喺度，你哋咪離遠都睇到佢囉！

原來呢隻蕉仲有喺日本其他機場出現，仲畀其他網友野生捕捉到?！天寒地凍都依然屹立不倒，果然係一條忠心服務嘅「實蕉」呀下～

仲有啲機場會一次過放幾個牌喺度。你話如果推住架行李車係前面跑，然後再放呢啲蕉皮牌出嚟，咪好似玩緊Mario Kart咁囉？真係一講啲回憶就返晒嚟呀！（溫提：不過乖嘅小朋友就記得唔好學喇。）

其實機場咁有創意，不如直程將呢隻小心地滑蕉變到好似呢set扭蛋咁啦。見到呢條咁誘人咁打耳嘅蕉，係人都會停低同佢影相打卡啦～到時啲人排晒大隊咁同佢影相，咁咪喺十尺遠已經成功引起注意，啲人又唔會睇唔到個牌搞到跣親囉！好似係。

封面圖片及資料來源：yokoney／twitter、toychan.net