平時上網睇得多喵星人汪星人嘅得意相，其實都幾想做返個奴才㗎，不過屋企地方咁細，住一家四口都係啱啱好咋，邊夠空間畀寵物活動啵，又唔想好似困住佢咁，唯有唔養住啦。有啲人又想慳位又想養下寵物嘅人就會選擇養魚喇，一個魚缸仔，迫迫地都夠位擺嘅～

如果間屋真係細到豆腐膶咁，連個魚缸仔都擺唔落嘅話，就要參考下呢個日本屋企嘅做法喇！吖個戶外魚池整到長條形咁又幾特別啵，仲成條河咁樣樣，融合埋大自然感覺呀！

睇真啲，原來係屋企門口條坑渠嚟㗎！屋主喺坑渠其中一截嘅兩頭擺咗個隔，中間就用嚟養錦鯉，一物二用之餘仲好似有條護城河咁威水啵！（頭盔：睇下好喇，落大雨你就知死，廣告都有話啦，夏天，為大地帶來雨水，疏導雨水需要暢通嘅渠道吖嘛！）

正所謂「最普通嘅地方就係最特別嘅地方」，咁簡單嘅道理喵星人都識啦，所以咪將通往貓星嘅神秘通道設喺路邊嘅坑渠囉！

之前發現呢個大咪咪嘅時候，仲喺度諗點解班喵星人要揀個咁污糟嘅地方，而家見到呢條錦鯉渠就終於都明喇，原來係為咗方便過關嗰陣順便帶啲手信返貓星！

富士宮の市街地を流れる水がどのくらいきれいかと言うと、自宅前の側溝を網で適当に仕切って魚を飼っている家がある。 pic.twitter.com/tB721efSOg

— 森伸之 (@gooitch) February 26, 2017

封面圖片、資料來源連結：gooitch／twitter、nyankichi5656／instagram

延伸閱讀：【緊急報告】日本攝影師發現通往貓星嘅神秘通道！