唔少女人都覺得影結婚相嗰時要用人生最巔峰嘅狀態去影，留住自己最靚嘅一刻，傻豬嚟嘅，咁講咪即係結完婚就可以放肆唔keep住個靚樣？咁點得㗎，陀BB嗰陣仲要影大肚寫真㗎嘛！好多人都話女人人生中最靚嘅moment一個就係待嫁，一個就係做準媽媽嘅時候，所以而家唔少準媽媽都會去影大肚寫真留念㗎～

喂，話明係大肚寫真，主角梗係媽媽同埋肚入面嘅BB啦，爸爸想影埋一份都得嘅，企喺隔籮囉，但係點解呢張相會得爸爸一個㗎呢？個爸爸仲要戴晒花環、又畫到個大肚腩花碌碌咁，係咪搞事先？

爸爸個大肚腩上面唔止畫咗花環，仲寫咗個女仔名Noelia，但佢個女同老婆都唔係呢個名㗎喎……相當有嫌疑呀下，你好講喇，到底點解寫個咁嘅女仔名喺身度呀！你係咪有咩對老婆阿女唔住！

原來佢咁做真係有段故㗎！話說佢有個女叫做Natalia，阿女出世之後，老婆咪叫佢去幫囡囡註冊囉，一早講好咗要起個名做Noelia㗎嘛，點知佢飲咗啲啤酒就醉咗，填錯咗Natalia呀！

阿女家陣都廿幾歲喇，都一直用緊個錯嘅名，佢有冇介意都好啦，老竇就一直將當年呢件事放喺心度，最近仲影咗呢輯大肚（腩）寫真送畀老婆當係補償。

係就係補償唔到啲乜㗎喇，不過最緊要大家開心吖嘛！最靚嘅女人係準媽媽，愛錫老婆仔女嘅爸爸，都一樣係最型嘅男人啫，大家都咁叻，呢舖打和！

封面圖片、資料來源連結：Huffington Post

同場加映：

【好幸福】狗仔影大肚寫真你見過未？

【係母愛呀哈利】台灣學生塞氣球感受做大肚婆有幾辛苦