如果要計成間公司邊個人最早死，毛毛九成都係第一個，事關我咪臭係坐正喺全office最強輻射個位－即係影印機隔籬囉！唔止係因為日日吸晒啲輻射呀，仲要個個唔識用影印機就問毛毛點用，大佬呀我坐佢隔籬啫，但我同佢唔熟㗎，咁大個人都唔識影印，有冇搞錯呀！連細路都識啦！

你睇，人哋小朋友都知撳咩掣可以影印到呀，你羞愧唔羞愧呀？不過咁喎，小朋友，乜你好似當部影印機係sss坑咁嘅？毛毛都明白你好想知道自己個粉嫩嘅屁肢可以擺到幾多圍嘅心情，不過你咁影印法，叫下一個要影印嘅人情何以堪呢……

睇埋其他相先知，呢個小朋友真係夠晒百厭活潑呀，連做運動用嘅繩都可以拎嚟當鞋帶咁穿，創造力量同幻想會嚇你一跳然後得啖笑呀！

日本人喺慶祝男童節嘅時候，就會喺屋外掛起鯉魚旗，希望細蚊仔好似鯉魚咁身體強壯、魚躍龍門，見到阿爸阿媽特登為咗自己而掛起七彩繽紛嘅鯉魚旗，係開心仔嘅，不過細路你自己都成條鯉魚咁喺半空飛，係咩玩法先？

而家唔少家長為咗令小朋友出街街嗰陣唔會周圍亂跑或者嘈嘈閉，都會畀部手機佢自己睇就算，搞到啲小朋友對住個mon仲多過對人。不過呢個咁搞笑嘅細路，就似乎拎住自己用A4紙D.I.Y.嘅遊戲機都玩得一餐喇。睇嚟如果小朋友學習環境輕鬆啲、阿爸阿媽唔會乜都管住晒，小朋友嘅創意小宇宙都會無限大咁啵～

友人から立派な複合機を譲って頂きました。大切に使います！ pic.twitter.com/c9w0FmUyJd

— もひかん@書籍発売御礼！ (@mohikan1974) April 30, 2017

封面圖片、資料來源連結： mohikan1974／twitter